இந்த பட ஹீரோவின் கண்கள் சூப்பர் ஸ்டார் போல சக்தி வாய்ந்தவை! -சொல்கிறார் ‘தக்ஸ்’ பட இயக்குநர் பிருந்தா மாஸ்டர்
நடன இயக்குநர் பிருந்தா இயக்கத்தில், ஹிருது ஹாரூன், பாபி சிம்ஹா, ஆர்.கே.சுரேஷ், முனிஷ்காந்த், அனஸ்வர ராஜன் மற்றும் பல முன்னணி நட்சத்திர நடிகர்கள் நடித்துள்ள படம் ‘தக்ஸ்.’
ஆக்சன் க்ரைம் திரில்லராக உருவாகியுள்ள இந்த படம் வரும் பிப்ரவரி 24-ம் தேதி தமிழ், தெலுங்கு, இந்தி மற்றும் கன்னடம் ஆகிய மொழிகளில் வெளியாகவுள்ள நிலையில் படக்குழுவினர் பத்திரிகையாளர்களை சந்தித்தனர்.
நிகழ்வில், இயக்குநர் பிருந்தா பேசும்போது,“தயாரிப்பாளர் ஷிபு தமீன்ஸ் அவரது மகன் ஹிருதுவை இந்த படத்தில் முக்கிய வேடத்தில் நடிக்க வைக்க முடியுமா என்று கேட்டபோது, எனக்குக் கொஞ்சம் தயக்கமாகத் தான் இருந்தது. ஆனால், அவருடைய நடிப்பைப் பார்த்த பிறகு, அவரிடம் நல்ல திறமை இருப்பதையும், அவரது கண்கள் சூப்பர் ஸ்டார் போலவே சக்தி வாய்ந்தவை என்பதையும் என்னால் உணர முடிந்தது. அவர் ஒரு சிறந்த நடனக் கலைஞரும்கூட. அவருக்குச் சிறந்த எதிர்காலம் உள்ளது. பாபி சிம்ஹா முக்கிய பாத்திரத்தில் நல்ல நடிப்பைத் தந்துள்ளார்” என்றார்.
படத்தின் நாயகன் ஹிருது ஹாரூன், “இந்த வாய்ப்பை வழங்கிய பிருந்தா மேடத்திற்கு நன்றி. படத்தில் வசனங்கள் குறைவாக உள்ளது, ஆனால், இசை நிறையப் பேசும். படம் உங்களுக்கு மிகவும் பிடிக்கும்” என்றார்.
தயாரிப்பாளர் ரியா ஷிபு, “இந்த திரைப்படத்தில் நான் ஒரு பகுதியாக இருப்பதில் மிகவும் மகிழ்ச்சி அடைகிறேன். ஒட்டு மொத்த டீமும் அபாரமான வேலை செய்திருக்கிறார்கள். என் அண்ணன் ஹிருது நாயகனாக அறிமுகமாவதில் மகிழ்ச்சியும் பெருமையும் அடைகிறேன். சாம் சிஎஸ்ஸின் இசை படத்தைப் படத்திற்கு உயிர்ப்பைத் தந்துள்ளது. முனிஷ்காந்த் சார் தனிப்பட்ட முறையில் எனக்கு மிகவும் பிடித்த நகைச்சுவை நடிகர். இந்த படத்தில் அவரது நடிப்பு எனக்கு மிகவும் பிடித்திருந்தது. படம் பெரிய வெற்றியைப் பெறும் எனும் நம்பிக்கை உள்ளது” என்றார்.
இசையமைப்பாளர் சாம் சிஎஸ்,“நான் பல திரைப்படங்களில் பணிபுரிந்துள்ளேன், அந்தப்படங்களின் கதை கேட்கும்போது ஆச்சரியமாக இருக்கும், ஆனால் படத்தின் இறுதிப்பதிப்பு பார்க்கும்போது ஏமாற்றமாகிவிடுகிறது. எந்தத் திரையுலகிலும் இது சகஜம் தான், ஆனால் தக்ஸ் திரைப்படம் இதில் தனித்துவம் வாய்ந்தது. ஒட்டுமொத்த படமும் அருமையாக வந்துள்ளது.
பிருந்தா மேடம் ஸ்கிரிப்டை விவரித்தபோதே கதை எனக்கு மிகவும் பிடித்தது. இப்போது முழுப்படமாக இன்னும் பிடித்துள்ளது.
அவர் எனது இசை மற்றும் பாடல்களில் எந்த தலையீடும் செய்யவில்லை. அதே போல் எந்த சமரசமும் இல்லாமல், தான் சொன்னதைச் சரியாகப் படமாக்கியிருக்கிறார்.
கதை மற்றும் தொழில்நுட்ப அம்சங்கள் இரண்டும் இப்படத்தில் மிக நன்றாக வந்துள்ளது. ஹிருது புதுமுகம் போல் தெரியவில்லை. நன்றாக நடித்துள்ளார். இந்தப் படம் அனைவருக்கும் பிடிக்கும் என்ற நம்பிக்கை எனக்கு இருக்கிறது” என்றார்.
நிகழ்வில், தயாரிப்பாளரும் நடிகருமான பி.எல். தேனப்பன், நடிகர் முனிஷ்காந்த், ஒளிப்பதிவாளர் பிரியேஷ் உள்ளிட்ட படக்குழுவினர் பேசினார்கள்.
படக் குழுவினர்:
இயக்கம்: பிருந்தா
தயாரிப்பு: ‘ஹெச் ஆர் பிக்சர்ஸ்’ ரியா ஷிபு
இசை: சாம் சி.எஸ்.
ஒளிப்பதிவு: பிரியேஷ் குருசுவாமி
புராஜக்ட் டிசைனர்: ஜோசப் நெல்லிக்கல்
எடிட்டர்: பிரவீன் ஆண்டனி
ஆக்சன்: பியோனிக்ஸ் பிரபு & ராஜசேகர்
கிரியேட்டிவ் தயாரிப்பாளர்: முத்து குருப்பையா
தயாரிப்பு ஒருங்கிணைப்பு : பரமேஷ்வர் சுபாஷ்
ஆடை: மாலினி கார்த்திகேயன்
நிர்வாக தயாரிப்பாளர்: யுவராஜ்
இணை இயக்குநர்: ஹரிஹர கிருஷ்ணன் ராமலிங்கம்
டிசைனர்: கபிலன்
மக்கள் தொடர்பு: சதீஷ் குமார் – சிவா (AIM)
22
