உடல் எடை குறைய ஓட்ஸ் எப்படி உதவி செய்யும்?

உடல் எடையைக் குறைக்க டயட்டில் இருக்கும் பெரும்பாலானோர் தங்களுடைய காலை உணவாக எடுத்துக் கொள்வது ஓட்ஸ் தான். அதுவும் டயட்டில் இருக்கிறோம் என்றால் எப்போதும் ஓட்ஸை கஞ்சியாக தான் சாப்பிடுவோம். அது சில நாட்களில் சலிப்பாகி டயட்டையே விட்டுவிடுவோம். அதற்கு பதிலாக டயட்டில் இருக்கும்போது இப்படி விதவிதமாக ஓட்ஸை சமைத்து சாப்பிடுங்கள். எடையையும் குறையுங்கள்.
ஓட்ஸ் குடல் இயக்கத்தை சீராக்கி உடலின் மெட்டபாலிசத்தை அதிகரிக்கச் செய்வதில் சிறப்பாகச் செயல்படக் கூடியது. இந்த உடல் எடையை குறைக்க நினைப்பவர்கள் எப்போதும் ஒரே மாதிரியாக தான் சாப்பிட வேண்டும் என்பது கிடையாது. எப்படியெல்லாம் ஓட்ஸை எடுத்துக் கொண்டு விரைவாக எடையை குறைக்கலாம் என்று பார்க்கலாம்.

எடை குறைய ஓட்ஸ் எப்படி உதவி செய்யும்?
ஓட்ஸ் நிறைய டயட்டரி ஃபைபர் கொண்டது. ஓட்ஸில் உள்ள இந்த அதிகப்படியான நார்ச்சத்துக்கள் பசியைக் கட்டுப்படுத்தி நீண்ட நேரம் வயிறு நிரம்பிய உணர்வோடு வைத்திருக்கும். இதனால் அதிக கலோரிகள் எடுத்துக் கொள்ளப்படுவது தவிர்க்கப்பட்டு உடல் எடையையும் தேவையற்ற கொலஸ்டிராலையும் குறைக்க முடியும்.

ஓட்ஸ் கிச்சடி
தேவையான பொருள்கள்
ஓட்ஸ் – 1 கப்
கேரட் – 1
பீன்ஸ் – 10
பச்சை பட்டாணி – 1 கைப்பிடி
எண்ணெய் – 2 ஸ்பூன்
உளுந்து – 2 ஸ்பூன்
கடலைப்பருப்பு – 2 ஸ்பூன்
வெங்காயம் – 1
பச்சை மிளகாய் – 1
இஞ்சி – சிறு துண்டு
கொத்தமல்லி – சிறிது
கடுகு – கால் ஸ்பூன்
தண்ணீர் – இரண்டரை கப்

செய்முறை

முதலில் வெறும் வாணலியில் ஓட்ஸை சேர்த்து லேசாக வாசனை வரும்வரை வறுத்து தனியே எடுத்து வைத்துக் கொள்ளுங்கள்.

பின்பு கேரட், பீன்ஸ் ஆகிய காய்கறிகளை பொடியாக நறுக்கி வைத்துக் கொள்ளுங்கள்.

ஒரு கடாயில் எண்ணெய் சேர்த்து காய்ந்ததும் அதில் கடுகு சேர்த்து பொரிந்ததும் உளுந்தம்பருப்பு மற்றும் கடலைப்பருப்பு சேர்த்து நன்கு பொன்னிறமானதும் அதில் பச்சை மிளகாய் மற்றும் பொடியாக நறுக்கிய இஞ்சி சேர்த்து வதக்குங்கள்.

அடுத்து நீளவாக்கில் நறுக்கிய வெங்காயத்தை சேர்த்து வதக்க வேண்டும். வெங்காயம் நன்கு வதங்கியதும் அதில் பொடியாக நறுக்கிய காய்கறிகளை சேர்த்து அதில் காய்கறிக்குத் தேவையான உப்பையும் சேர்த்து நனகு வதக்குங்கள்.

காய்கறிகள் பாதி வேகும்வரை வதங்கியதும் அதில் எடுத்து வைத்திருக்கும் தண்ணீரை சேர்த்து நன்கு கொதிக்க விடவும்.

தண்ணீர் நன்கு கொதித்ததும் உப்பை சரிபார்த்து அதில் வறுத்து வைத்திருக்கும் ஓட்ஸை கொஞ்சம் கொஞ்சமாகச் சேர்த்து கிளறுங்கள்.

அடுப்பை மிதமான தீயில் வைத்து நன்கு ஓட்ஸ் வேகும் வரை கிளறி, இறக்கும்போது வாசனை பிடித்தால் அரை ஸ்பூன் நெய் சேர்த்து இறக்குங்கள்.

மிகவும் சுவையான, ஆரோக்கியமான ஓட்ஸ் கிச்சடி தயார்.

ஓட்ஸ் தோசை

ஓட்ஸ் – 1 கப்
வெங்காயம் – 1 (பொடியாக நறுக்கியது)
கேரட் – 1 (துருவியது)
பச்சை மிளகாய் – 1 (பொடியாக நறுக்கியது)
கொத்தமல்லி – சிறிதளவு
ரவை – ஒரு ஸ்பூன்
அரிசி மாவு – 3 ஸ்பூன்
உப்பு – தேவையான அளவு
தயிர் – 2 ஸ்பூன்

செய்முறை

ஓட்ஸை வெறும் வாணலியில் சேர்த்து வாசனை வரும் வரை நனகு வறுத்துக் கொள்ளுங்கள்.

இதை மிக்ஸியில் சேர்த்து நன்கு பொடித்து எடுத்துக் கொள்ளுங்கள். இந்த பொடியுடன் எடுத்து வைத்திருக்கும் அரிசி மாவு, ரவை மற்றும் தயிர் சேர்த்து 10 நிமிடங்கள் வரை ஊற விடுங்கள்.

பிறகு அதில் நறுக்கிய வெங்காயத்தை சேர்த்து, பச்சை மிளகாய், துருவிய கேரட், கொத்தமல்லி இலை ஆகியவற்றைச் சேர்த்து நன்கு கொஞ்சம் திக்கான பேஸ்ட்டாக கரைத்துக் கொள்ள வேண்டும்.

தோசை மாவு அளவுக்கு இருந்தால் ஓட்ஸ் தோசை திருப்ப முடியாது. அதனால் அடை மாவு பதத்துக்கு கரைத்து தோசைக்கல்லில் திக்காக ஊத்தப்பம் போல ஊற்றி எடுக்க வேண்டும்.

இதற்கு உங்களுக்குப் பிடித்த சட்னியை சேர்த்துக் கொள்ளுங்கள்.

புரதச்சத்து நிறைந்த ஓட்ஸ் ஆம்லெட்
தேவையான பொருள்கள்

ஓட்ஸ் – 3 ஸ்பூன்
முட்டை – 1
வெங்காயம் – பொடியாக நறுக்கியது
பச்சை மிளகாய் – 1
கேரட் – பாதி (துருவியது)
கொத்தமல்லி இலை – சிறிது
உப்பு – தேவையான அளவு
மிளகு – கால் ஸ்பூன்

செய்முறை

ஒரு பாத்திரத்தில் முட்டையை உடைத்து அதில் உப்பு, மிளகுத் தூள் சேர்த்து நன்கு அடித்துக் கொள்ள வேண்டும்.

அதோடு ஓட்ஸ், வெங்காயம், கேரட் ஆகியவற்றைச் சேர்த்து நன்கு கலந்து கொள்ளுங்கள்.

தோசைக்கல்லில் இதை ஆம்லெட்டாக ஊற்றி எடுக்கலாம்.

டயட்டில் .இருப்பவர்கள் இதை காலை உணவாக எடுத்துக் கொள்ளலாம்.

ஓட்ஸ் புட்டு
தேவையான பொருள்கள்

ஓட்ஸ் – 1 கப் (பொடி செய்தது)
வெந்நீர் – ஒரு டம்ளர்
உப்பு – ஒரு சிட்டிகை
தேங்காய் துருவல் – அரை கப்

செய்முறை

அரிசி புட்டு செய்வதைப் போன்று ஓட்ஸ் மாவில் உப்பு சேர்த்து வெந்நீர் சேர்த்து நன்கு உதிரி உதிரியாக புட்டு மாவு பதத்துக்கு பிசைந்து கொள்ள வேண்டும்.

தேங்காயையும் துருவிக் கொள்ள வேண்டும். இட்லி பாத்திரத்தில் இந்த மாவை தேங்காயுடன் கலந்து ஆவியில் வேக வைத்து எடுத்தால் சுவையான ஓட்ஸ் புட்டு ரெடி.

வெந்தபிறகு மீண்டும் கொஞ்சம் ஃபிரஷ்ஷான துருவிய தேங்காயை சேர்த்து சாப்பிடலாம்.

ஓட் மீல்
தேவையான பொருள்கள்

ஓட்ஸ் – 1 கப்
பால் – 1 கப்
விருப்பமான பழங்கள் – 1 கப்
தேன் – 1 ஸ்பூன்
இலவங்கப்பட்டை பொடி – சிறிது

செய்முறை

ஒரு பௌலில் ஓட்ஸை சேர்த்து அதனுடன் காய்ச்சி ஆறவைத்த பால், இலவங்கப்பட்டை பொடி, விருப்பமான பழங்கள் பொடியாக நறுக்கியது ஆகியவற்றைச் சேர்த்து கலந்தால் ஓட்மீல் ரெடி.

தேவைப்பட்டால் தேன் சேர்த்துக் கொள்ளலாம்.

நன்றி: Aadhavan Siddhashram Pvt Ltd சித்த மருத்துவர் அருண் சின்னையா